Flokkur: Lóafóa

Ég heiti Lóa Kristín og er menntaður húsgagnasmiður og kennari.

Ég hef alltaf verið skapandi og er mitt aðaláhugamál að skapa/smíða hluti, fígúrur, myndir og fleira.

Ég hef starfað sem smíðakennari í 18 ár. Út frá umhverfisstefnu skólans fæddist sú hugmynd að nýta afgangsbúta (frásag) í svokölluð endurnýtingarverkefni. Í dag eru endurnýtingarverkefni hluti af minni smíðakennslu í öllum árgöngum.

Ég prófaði mig áfram og var alveg heltekin af því að kubba fígúrur úr afgangsbútum, en ég kalla þessa vinnu að kubba.

Fyrst litaði ég fígúrurnar og/eða skreytti með brennipenna. Svo fór ég að prufa ónýt tímarit og límlakk en þá vinnu kalla ég að mála með skærum. Myndirnar sem ég nota koma úr gömlum eða ónýtum tímaritum, barnabókum, landabréfabókum, náttúrumyndabókum o.fl.

Pí-kassó verur

Verurnar sem ég kubba saman úr afgöngum kalla ég Pí-kassó verur. Það er vísun í Pablo Picasso og stærðfræði merkið Pí, en kubbarnir eru í stærðfræði formum.

Ég er líka fædd sama dag og Picasso, þann 25. október, og er mjög hrifin af listinni hans.

Farfugla, furðufugla, furðufiska, klukkur, orð o.fl. teikna ég upp og saga út og skreyti með aðferðinni málað með skærum.